قلت أبا أوصف غلاك وما قدرت أوصل مداك=كل أحاسيسي أتّساءل كيف ترسم هيأتك؟
.
القمر شامه ع خدّك والحلا أصله حلاك=والنجوم اللي التلألأ لألأتها شامتك
.
كن مسعاها جبينك..! حظّها يمشي وراك=والجمال اللي ارسمه وجه الطبيعة فتنتك
.
آه لو تدري بصبحك كيف يشتاق لمساك=في تلاقيهم خيالٍ خاتلٍ في مقلتك
.
الجبل لو جاه صوتك ما يرجّع لك صداك=يعني لو جنبه يتزلزل قبل تنطق كلمتك!
.
ما تهب الريح الا لأنها تلعب معاك=والورود اللي تشّمك عطّرتها ريحتك
.
أكسجين الأرض ودّه بس يتنفس هواك=يعني لو تدري المجرّه عن مداره جرّتك!
.
كل قطرة ماي تسعى جاهده تروي ضماك=والثريا في صراعٍ معْ ثرى اللي شلّتك
.
رمش عينك لو تحرّك قالت الدنيا فداك=عقرب الساعه يوقّف لو تناظر ساعتك
.
من بدابك ما أنْتهى بك يعني لو ينهى بداك=والحلم مغرم بنومك جمّعتهم شمعتك
.
الزّعل ما جا فدربك شغله الشاغل رضاك=وإن جا بالصّدفه تأكد شوق دربه لخطوتك
.
الليالي سر غامض ما يحلّلها سواك=أمهر الفرسان عاجز أنْ يروض مهرتك
.
دنية اللّي ما يضيقْ تْضيق لو تفقد ضياك=وكل شي تمر جنبه يبتهج من شوفتك
.
يا غلا كل الوجود شلون أبا أوصف لك غلاك=وكل أحاسيس أتّساءل كيف ترسم هيأتك؟